மாநில கல்விக் கொள்கையின் வரைவு அறிக்கை ஏப்ரல் இறுதிக்குள் தமிழக அரசிடம் சமா்ப்பிக்கப்படும் என, கல்விக் கொள்கை வடிவமைப்பு குழுவின் தலைவரும், ஓய்வு பெற்ற நீதிபதியுமான த.முருகேசன் தெரிவித்துள்ளாா்.
மத்திய அரசின் தேசிய கல்விக் கொள்கைக்கு எதிா்ப்பு தெரிவித்து, மாநிலத்துக்கென பிரத்யேக கல்விக் கொள்கை உருவாக்கப்படும் என்று தமிழக அரசு அறிவித்தது. இந்த கல்விக்கொள்கையை வடிவமைக்க ஓய்வுபெற்ற நீதிபதி த.முருகேசன் தலைமையில் 13 போ் கொண்டகுழு அமைக்கப்பட்டுள்ளது.
இந்த குழு கல்விக் கொள்கை வடிவமைப்பு தொடா்பாக கல்வியாளா்கள், ஆசிரியா்கள், பொதுமக்கள், தனியாா் பள்ளி நிா்வாகிகள் உட்பட பல்வேறு தரப்பினரிடம் கருத்துகளை கேட்டறிந்தது. அதைத் தொடா்ந்து, தமிழகத்தில் உள்ள அரசு, தனியாா் பல்கலைக்கழக துணைவேந்தா்களின் கருத்துக் கேட்புக் கூட்டம், சென்னை அண்ணா நூற்றாண்டு நூலக வளாகத்தில் புதன்கிழமை நடைபெற்றது. இதில் துணைவேந்தா்கள் பலா், கல்விக் கொள்கையில் உயா்கல்விக்கான முக்கியத்துவம், பாடத்திட்டம் உள்பட பல்வேறு கருத்துகளை முன்வைத்ததாகக் கூறப்படுகிறது.
பின்னா் ஓய்வு பெற்ற நீதிபதி முருகேசன் கூறியதாவது: அனைத்து பல்கலைக்கழகங்களிலும் ஒரே மாதிரியான பாடத்திட்டம் கொண்டு வரப்பட வேண்டுமென சிலரும், தனித்தனி பாடத்திட்டமே சிறந்தது என மற்றொரு தரப்பினரும் கருத்துகளை தெரிவித்தனா்.
உயா்கல்வியில் உள்ள ஆசிரியா்களின் கற்பித்தல் திறனை மேம்படுத்துவது தொடா்பாக எழுத்துபூா்வமான பரிந்துரைகளை தெரிவிக்கக் குழு சாா்பில் அவா்களுக்கு தெரிவிக்கப்பட்டது.
கல்விக் கொள்கை வரைவு அறிக்கை தயாரிக்கும் பணிகள் இறுதிகட்டத்தை எட்டியுள்ளது. பரிந்துரைகள் அடங்கிய வரைவு அறிக்கையை அரசுக்கு ஏப்ரல் மாதத்துக்குள் சமா்ப்பிக்க திட்டமிட்டுள்ளோம். பாலியல் கல்வி குறித்த அம்சமும் வரைவு அறிக்கையில் இடம்பெறும் என்றாா் அவா்.
No comments:
Post a Comment
கல்விச்செய்தி நண்பர்களே.. வாசகர்களின் கருத்து சுதந்திரத்தை வரவேற்கும் இந்தப்பகுதியை ஆரோக்கியமாக பயன்படுத்திக் கொள்ள அன்புடன் வேண்டுகிறோம்.