மாணவர்களைக் குறிவைக்கும் புதிய ஸ்காலர்ஷிப் மோசடி: QR கோடு ஸ்கேன் செய்தால் வங்கிப் பணம் காலி!

அதிர்ச்சி! மாணவர்களைக் குறிவைக்கும் புதிய ஸ்காலர்ஷிப் மோசடி: கியூ.ஆர். கோடு ஸ்கேன் செய்தால் வங்கிப் பணம் காலி - சைபர் கிரைம் போலீஸ் எச்சரிக்கை!

மாணவர்களைக் குறிவைக்கும் புதிய ஸ்காலர்ஷிப் மோசடி: QR கோடு ஸ்கேன் செய்தால் வங்கிப் பணம் காலி!

தமிழகத்தில் மாணவர்களுக்கு ஸ்காலர்ஷிப் கிடைத்துள்ளதாகக் கூறி பெற்றோர்களை ஏமாற்றி, யு.பி.ஐ கியூ.ஆர். கோடு மூலம் பணம் பறிக்கும் புதிய மோசடி குறித்துக் கோவை சைபர் கிரைம் போலீசார் எச்சரிக்கை விடுத்துள்ளனர். முழு விபரம் உள்ளே.

தமிழகத்தில் பள்ளி மற்றும் கல்லூரி மாணவர்களைக் குறிவைத்து புதிதாக முளைத்துள்ள ஸ்காலர்ஷிப் மோசடி (Scholarship Scam) குறித்துக் கோவை சைபர் கிரைம் போலீசார் பெற்றோருக்கு அதிரடி எச்சரிக்கை விடுத்துள்ளனர். மாணவர்களுக்குக் கல்வி உதவித்தொகை வந்துள்ளதாகக் கூறி, பெற்றோர்களைத் தொடர்பு கொள்ளும் மோசடி நபர்கள், கியூ.ஆர். கோடு (QR Code) மூலம் அவர்களின் வங்கிப் பணத்தைச் சுருட்டி வருவது பெரும் பரபரப்பை ஏற்படுத்தியுள்ளது.

பெற்றோர்களை நம்பவைக்கும் நூதன மோசடிப் பின்னணி:

சைபர் குற்றவாளிகள் பல்வேறு டேட்டா பேஸ்களில் (Data Base) இருந்து மாணவர்களின் மொபைல் எண்கள், மாணவர் பெயர், பெற்றோர் பெயர் மற்றும் அவர்கள் படிக்கும் கல்லூரி விபரங்களை ரகசியமாகச் சேகரிக்கின்றனர். பின்னர், அரசு அலுவலகம் அல்லது கல்வித்துறையிலிருந்து பேசுவது போலப் பெற்றோர்களைத் தொடர்பு கொண்டு பேசுகின்றனர். தங்களின் பிள்ளைகளின் விபரங்களைத் துல்லியமாகக் கூறுவதால், பெற்றோர்களும் அந்த மோசடி நபர்களை உண்மை என்றே நம்பிவிடுகின்றனர்.

அப்போது, "உங்கள் பிள்ளைக்கு அரசு/தனியார் ஸ்காலர்ஷிப் வந்துள்ளது. அதனை உங்கள் வங்கிப் கணக்கிற்குப் பெற நாங்கள் அனுப்பும் யு.பி.ஐ. (UPI) கியூ.ஆர். கோடை ஸ்கேன் செய்ய வேண்டும்" என ஆசை வார்த்தைகளைக் கூறுகின்றனர். பணம் வரப்போகிறது என்ற அவசரத்தில், தேவையற்ற கியூ.ஆர். கோடுகளைப் பெற்றோர் ஸ்கேன் செய்யக் கூடாது எனச் சைபர் கிரைம் போலீசார் கடுமையாக எச்சரித்துள்ளனர்.

பணம் பெற கடவுச்சொல் தேவை இல்லை!

மோசடியின் நுட்பம் குறித்து போலீசார் விளக்குகையில், பொதுவாக நமது வங்கிப் கணக்கிற்குப் பணம் வர வேண்டுமானால் யு.பி.ஐ. செயலியில் எந்தவொரு கியூ.ஆர். கோடையும் ஸ்கேன் செய்ய வேண்டிய அவசியமோ அல்லது ரகசியக் கடவுச்சொல்லை (UPI PIN) உள்ளிட வேண்டிய தேவையோ இல்லை. ஆனால், மோசடி நபர்கள் அனுப்பும் கியூ.ஆர். கோடை ஸ்கேன் செய்து, பணம் கிடைக்கும் என்று நினைத்துப் பெற்றோர் கடவுச்சொல்லைப் பதிவு செய்கின்றனர். இதனால், பணம் பெறுவதற்குப் பதிலாக, அவர்களின் வங்கிக் கணக்கில் உள்ள பணம் உடனடியாகப் பறிபோய்விடுகிறது.

கோவையில் 9 மாதங்களில் 4,360 புகார்கள்:

கோவை மாவட்ட சைபர் கிரைம் பிரிவில் கடந்த 9 மாதங்களில் மட்டும் சுமார் 4,360 புகார்கள் பதிவாகியுள்ளன. இதில் வியப்பளிக்கத்தக்க வகையில் 70 சதவீதப் புகார்கள் ஆன்லைன் முதலீடு தொடர்பானவை ஆகும். இதுதவிர டிஜிட்டல் அரெஸ்ட் (Digital Arrest), ஏ.பி.கே. பைல் (APK File) மோசடி, ஆன்லைன் வேலை வாய்ப்பு மோசடி, திருமண மோசடி, கே.ஒய்.சி. (KYC) அப்டேட் உள்ளிட்ட பல்வேறு சைபர் மோசடிப் புகார்கள் பதிவாகியுள்ளன.

இந்த ஆண்டு ஜனவரி மாதம் முதல் தற்போது வரை, 118 வழக்குகளில் பொதுமக்கள் சுமார் 9 கோடி ரூபாய் வரை பணத்தை இழந்துள்ளதாகப் போலீசார் தெரிவித்துள்ளனர். தீவிர புலனாய்வு மூலம் இதில் 2.10 கோடி ரூபாயை சைபர் கிரைம் போலீஸார் மீட்டுள்ளனர். மேலும் இது தொடர்பாக 25 பேர் கைது செய்யப்பட்டுள்ளனர்.

'சீக்கிரம் புகார் அளித்தால் பணத்தை மீட்க முடியும்' - சைபர் கிரைம் இன்ஸ்பெக்டர் அறிவுரை:

இது குறித்து சைபர் கிரைம் இன்ஸ்பெக்டர் கவிதா அவர்கள் கூறுகையில், "பொதுமக்கள் அவசியமில்லாத எந்தவொரு கியூ.ஆர். கோடையும் மொபைலில் ஸ்கேன் செய்ய வேண்டாம். தெரியாத நபர்களிடம் இருந்து வரும் 'பேமெண்ட் ரிக்வஸ்ட்' (Payment Request)-ஐ அங்கீகரிக்க வேண்டாம். ஸ்காலர்ஷிப் தொடர்பான அழைப்பு வந்தால், பெற்றோர் உடனடியாகச் சம்பந்தப்பட்ட கல்வி நிறுவனத்தை நேரடியாகத் தொடர்பு கொண்டு சரிபார்க்க வேண்டும்" எனக் கேட்டுக்கொண்டுள்ளார்.

மேலும், சைபர் குற்றங்களால் பாதிக்கப்பட்டவர்கள் உடனடியாக 1930 என்ற தேசிய சைபர் கிரைம் உதவி எண்களுக்கு உடனே தொடர்பு கொண்டு புகார் அளித்தால், இழந்த பணத்தை முடக்கிப் பத்திரமாக மீட்பதற்கான வாய்ப்புகள் அதிகம். தாமதமாக வரும் புகார்களால் இழந்த பணத்தை மீட்பதில் பெரும் சிரமம் ஏற்படும் என்றும் அவர் எச்சரித்துள்ளார்.

கல்வித்துறை மற்றும் அரசுப் பணிகள் குறித்த உடனுக்குடனான செய்திகளைப் பெற நமது தளத்தைத் தொடர்ந்து பின்தொடருங்கள்!