திமுக நிலைதான் தவெகவுக்கும்! பழைய ஓய்வூதியத் திட்டம் குறித்து அரசு ஊழியர்கள், ஆசிரியர்கள் அதிரடி எச்சரிக்கை!

திமுக நிலைதான் தவெகவுக்கும்! பழைய ஓய்வூதியத் திட்டம் குறித்து அரசு ஊழியர்கள், ஆசிரியர்கள் அதிரடி எச்சரிக்கை!
மத்திய அரசு கடன் வழங்கினால் மட்டுமே டாப்ஸ் (TAPS) திட்டம் அமல்படுத்தப்படும் என்ற அறிவிப்புக்கு அரசு ஊழியர்கள் மற்றும் ஆசிரியர் சங்கங்கள் கடும் எதிர்ப்பு தெரிவித்துள்ளனர். வாக்குறுதியை மீறினால் திமுகவுக்கு ஏற்பட்ட நிலைதான் தவெகவுக்கும் ஏற்படும் என எச்சரித்துள்ளனர்.

திமுக நிலைதான் தவெகவுக்கும்... அரசு ஊழியர்கள், ஆசிரியர்கள் அதிரடி எச்சரிக்கை!

சென்னை (ஆகஸ்ட் 12): மத்திய அரசு கூடுதல் கடன் வழங்க அனுமதித்தால் மட்டுமே தமிழ்நாட்டில் டாப்ஸ் (TAPS) ஓய்வூதியத் திட்டம் நிறைவேற்றப்படும் என்று நிதியமைச்சர் மரிய வில்சன் சட்டசபையில் தெரிவித்த கருத்துக்கு, அரசு ஊழியர்கள் மற்றும் ஆசிரியர் சங்கங்கள் மத்தியில் கடும் கொந்தளிப்பும் எதிர்ப்பும் கிளம்பியுள்ளது.

தேர்தல் வாக்குறுதிக்கு மாறாக அரசு செயல்பட்டால், கடந்த ஆட்சியில் திமுக சந்தித்த அதே நிலையையே தவெக அரசும் சந்திக்க நேரிடும் என்று ஆசிரியர் மற்றும் அரசு ஊழியர் சங்கப் பிரதிநிதிகள் கடுமையாக எச்சரித்துள்ளனர்.

ககன்தீப் சிங் பேடி குழுவின் அறிக்கையை வெளியிட கோரிக்கை

மத்திய அரசு கடன் வழங்கினால் டாப்ஸ் திட்டத்தை அமல்படுத்தலாம் என ககன்தீப் சிங் பேடி தலைமையிலான குழு பரிந்துரைத்துள்ளதாக சட்டசபையில் நிதியமைச்சர் மரிய வில்சன் குறிப்பிட்டிருந்தார்.

இது குறித்து சிபிஎஸ் (CPS) ஒழிப்பு இயக்கத்தின் மாநில தலைமை ஒருங்கிணைப்பாளர்கள் ஜெயராஜ ராஜேஸ்வரன், பிரடெரிக் எங்கெல்ஸ் மற்றும் செல்வக்குமார் ஆகியோர் தங்களது கண்டனத்தைப் பதிவு செய்துள்ளனர்.

"திமுக அரசு எந்த அடிப்படையில் டாப்ஸ் திட்டத்தை அறிவித்தது என்பதை அரசு தெளிவுபடுத்த வேண்டும். ககன்தீப் சிங் பேடி குழுவின் பரிந்துரைகளையும் அதன் முழு அறிக்கையையும் தமிழக அரசு உடனடியாக பொதுவெளியில் வெளியிட வேண்டும்" என அவர்கள் வலியுறுத்தியுள்ளனர்.

வாக்குறுதியை மீறினால் திமுகவுக்கு ஏற்பட்ட நிலைதான் தவெகவுக்கும்!

தவெக தனது தேர்தல் அறிக்கையில், திமுக கொண்டு வந்த டாப்ஸ் திட்டம் ஒழிக்கப்பட்டு, அரசு ஊழியர்களின் நீண்டகால கோரிக்கையான முழுமையான 'பழைய ஓய்வூதியத் திட்டம்' (OPS) கனிவுடன் பரிசீலிக்கப்பட்டு அமல்படுத்தப்படும் என்று வாக்குறுதி அளித்திருந்தது.

ஆனால், இப்போது டாப்ஸ் திட்டத்தை ஒழிப்பதற்கு பதிலாக, "மத்திய அரசு கடன் உதவி வழங்கினால் மட்டுமே அமல்படுத்துவோம்" எனக் கூறுவது அளிக்கப்பட்ட தேர்தல் வாக்குறுதியை அப்பட்டமாக மீறும் செயலாகும்.

பழைய பென்ஷன் திட்டத்தை அமல்படுத்துவோம் என்று கூறிவிட்டு, அதற்கு மாறாக டாப்ஸ் திட்டத்தை அறிவித்ததால் தான் திமுக பின்னடைவைச் சந்தித்தது. அதேபோல அரசு ஊழியர்களையும் ஆசிரியர்களையும் ஏமாற்றலாம் என்று தவெக அரசு நினைத்தால், திமுகவுக்கு ஏற்பட்ட அதே நிலைதான் தவெக அரசுக்கும் ஏற்படும் என சங்கப் பிரதிநிதிகள் எச்சரித்துள்ளனர்.

நிதி ஒதுக்கீடு குறைப்பு - கொந்தளிப்பில் ஆசிரியர் சங்கங்கள்

தமிழ்நாடு முதுநிலை பட்டதாரி ஆசிரியர் கழக பொதுச் செயலாளர் அன்பழகன் இது குறித்துக் கூறுகையில்:

"தவெக தனது தேர்தல் வாக்குறுதியில் பழைய பென்ஷன் திட்டத்தை மதிப்பீடு செய்வதாகக் கூறியிருந்தது. ஆனால், அந்த வாக்குறுதியை நிறைவேற்றுவதற்கான எந்தவொரு திட்டமிடலையும் அரசு தொடங்கவில்லை.

மேலும், டாப்ஸ் திட்டத்திற்காக முன்னர் ஒதுக்கீடு செய்யப்பட்ட ரூ. 15,997 கோடியை தற்போதைய அரசு ரூ. 4,997 கோடியாகக் குறைத்துள்ளது அதிர்ச்சியளிக்கிறது.

ஓய்வூதியத் திட்டம் குறித்து ஆய்வு செய்ய அமைக்கப்பட்ட ககன்தீப் சிங் பேடி குழு, மத்திய அரசு கடன் வாங்க அனுமதித்தால் மட்டுமே டாப்ஸ் திட்டத்தை நடைமுறைப்படுத்த முடியும் என்று கூறியிருப்பது பேரதிர்ச்சியை ஏற்படுத்தியுள்ளது. ஆசிரியர்களுக்கும் அரசு ஊழியர்களுக்கும் கொடுத்த வாக்குறுதிக்கு மாறாக அரசு செயல்படும்போது, மாநிலம் தழுவிய வலுவான போராட்டத்தைக் கையில் எடுப்போம்" என்று அவர் தெரிவித்துள்ளார்.