ஆசிரியர்களின் கோரிக்கைகள் நிறைவேற்றப்படுமா? - அமைச்சர் ராஜமோகன் அளித்த முக்கிய உறுதி!

ஆசிரியர்களின் கோரிக்கைகள் நிறைவேற்றப்படுமா? - அமைச்சர் ராஜமோகன் அளித்த முக்கிய உறுதி!

முதலமைச்சரின் அனுமதி பெற்று ஆசிரியர்களின் கோரிக்கைகளை நிறைவேற்ற முயற்சிப்பேன்: ஆசிரியர் சங்க நிர்வாகிகளிடம் அமைச்சர் ராஜமோகன் உறுதி!

சென்னை: ஆசிரியர்களின் நியாயமான கோரிக்கைகள் அனைத்தும் பரிசீலிக்கப்பட்டு, தமிழக முதல்வரின் அனுமதி பெற்று சாத்தியமான அனைத்துக் கோரிக்கைகளும் நிறைவேற்றப்படும் என்று பள்ளிக்கல்வித்துறை அமைச்சர் ராஜமோகன் ஆசிரியர் சங்கங்களின் நிர்வாகிகளிடம் உறுதியளித்துள்ளார்.

சென்னை அண்ணா நூற்றாண்டு நூலக கூட்டரங்கில், அனைத்து ஆசிரியர் சங்கங்கள் மற்றும் ஆசிரியரல்லாத பணியாளர் சங்கங்களின் நிர்வாகிகளுடன் கலந்துரையாடிய பள்ளிக்கல்வி அமைச்சர் ராஜமோகன். உடன் பள்ளிக் கல்வித்துறை செயலாளர் பி.சந்திர மோகன் உள்ளிட்ட அதிகாரிகள்.

அண்ணா நூற்றாண்டு நூலகத்தில் முக்கிய ஆலோசனைக் கூட்டம்

சென்னை கோட்டூர்புரம் அண்ணா நூற்றாண்டு நூலகக் கூட்டரங்கில் அனைத்து ஆசிரியர் சங்கங்கள் மற்றும் ஆசிரியரல்லாத பணியாளர் சங்கங்களின் நிர்வாகிகளுடன் பள்ளிக்கல்வித்துறை அமைச்சர் ராஜமோகன் நேரில் கலந்துரையாடினார்.

வெளிப்படையான அரசு நிர்வாகமே இலக்கு - அமைச்சர் உரை

இக்கூட்டத்தில் அமைச்சர் பேசுகையில் தெரிவித்ததாவது:

"உலகில் பேசித் தீர்க்க முடியாத பிரச்சினைகள் எதுவும் கிடையாது. அந்த வகையில் நாமும் பிரச்சினைகளைப் பேசி அதற்குத் தீர்வு காணப்போகிறோம். சில பிரச்சினைகளை எளிதில் சொல்லிவிட முடியாது. அதே நேரத்தில் நடைமுறைக்கு எது சாத்தியமோ அதை உள்ளதை உள்ளபடி வெளிப்படையாகப் பேச வேண்டும், வெளிப்படையாக நடந்துகொள்ள வேண்டும் என்பதுதான் எங்கள் இலக்கு. ஏனெனில் எங்களுக்கு இந்த வாய்ப்பைத் தந்துள்ள முதல்வர், வெளிப்படையான அரசு நிர்வாகம் என்ற நிலைப்பாட்டை அறிவித்திருக்கிறார்."

மேலும் தொடர்ந்து பேசிய அவர், "எது மக்களுக்கு நல்லது? எது மாணவர்களுக்கு நல்லது? எது பெற்றோருக்கு நல்லது? எது ஆசிரியர்களுக்கு நல்லது? என்பதை மட்டுமே இலக்காகக் கொண்டு நமது பள்ளிக்கல்வித்துறை பயணித்து வருகிறது. அப்படிப்பட்ட இத்துறையின் ஆணிவேராக இருப்பவர்கள் ஆசிரியர்கள் ஆவர்" எனக் குறிப்பிட்டார்.

மென்பொருள் மற்றும் செயலி மூலம் மனுக்கள் பரிசீலனை

ஆசிரியர் சங்கங்களின் பல்வேறு நிலைப் பாடுகள் குறித்துப் பேசிய அமைச்சர், ஒவ்வொரு சங்கமும் தங்கள் கோரிக்கைகளைத் தாராளமாக முன்வைக்கலாம் என்றும், அனைத்துக் கருத்துக்களும் முறையாக ஆவணப்படுத்தப்படும் என்றும் தெரிவித்தார்.

மனுக்களைத் திறம்படக் கையாளும் புதிய முறை குறித்து அவர் கூறுகையில், "என்னிடம் வரக்கூடிய மனுக்களை எல்லாம் ஒரு செயலியில் பதிவு செய்து, மென்பொருள் மூலமாக முன்னுரிமை அடிப்படையில் பிரிக்கிறேன். இவ்வாறு ஆவணப்படுத்துவது மூலமாக, மனுக்கள் மீது எடுக்கப்பட்ட நடவடிக்கைகளைக் கண்காணிக்க முடியும்" என்று தெரிவித்தார்.

இறுதியாக, தமிழக முதல்வரின் அனுமதி பெற்று ஆசிரியர்களின் என்னென்ன கோரிக்கைகளை நிறைவேற்ற முடியுமோ, அவற்றை எல்லாம் நிறைவேற்ற முழு முயற்சி எடுப்பேன் என அமைச்சர் உறுதி கூறினார்.

நிகழ்ச்சியில் பங்கேற்ற உயராதிகாரிகள்:

• பி. சந்திர மோகன் - பள்ளிக்கல்வித்துறை செயலாளர்
• எஸ். கண்ணப்பன் - பள்ளிக்கல்வி இயக்குநர்
• பி.ஏ. நரேஷ் - தொடக்கக் கல்வி இயக்குநர்