ஆசிரியர் தகுதித் தேர்வு (TET) விலக்கு தீர்மானம் சட்டப்பேரவையில் நிறைவேற்றம் - ஆசிரியர் சங்கங்கள் வரவேற்பு!

ஆசிரியர் தகுதித் தேர்வு (TET) விலக்கு தீர்மானம் சட்டப்பேரவையில் நிறைவேற்றம் - ஆசிரியர் சங்கங்கள் வரவேற்பு!

ஆசிரியர் தகுதித் தேர்வில் இருந்து விலக்கு: தமிழக சட்டப்பேரவையில் ஒருமனதாக தீர்மானம் நிறைவேற்றம்!

சென்னை: 23.08.2010-க்கு முன்னர் பணியில் சேர்ந்த இடைநிலை மற்றும் பட்டதாரி ஆசிரியர்கள் அனைவரும் பணியில் தொடர தகுதித் தேர்வு கட்டாயம் என்ற உச்சநீதிமன்றத் தீர்ப்பினைத் தொடர்ந்து, தமிழக சட்டப்பேரவையில் ஆசிரியர் தகுதித் தேர்வில் (TET) இருந்து முழு விலக்கு அளிக்கக்கோரும் தனித் தீர்மானம் ஒருமனதாக நிறைவேற்றப்பட்டுள்ளது.

உச்சநீதிமன்றத் தீர்ப்பும் ஆசிரியர்களின் தவிப்பும்

கடந்த காலங்களில் பதவி உயர்வுக்குத் தகுதித் தேர்வு கட்டாயம் எனத் தொடரப்பட்ட வழக்கில், உச்சநீதிமன்றம் பதவி உயர்வு மட்டுமின்றி ஆசிரியர் பதவியில் தொடரவும் தகுதித்தேர்வு கட்டாயம் என அதிரடித் தீர்ப்பு வழங்கியது. இதனால் ஓய்வு பெற ஐந்து ஆண்டிற்கு மேல் உள்ளவர்கள் குறிப்பிட்ட காலத்திற்குள் தகுதித் தேர்வில் தேர்ச்சி பெற வேண்டும் இல்லையெனில் கட்டாய ஓய்வு என்ற இக்கட்டான சூழல் உருவாகியது. இது தமிழகத்தில் உள்ள சுமார் 3.28 லட்சத்திற்கும் அதிகமான ஆசிரியர்களுக்குப் பெரும் அதிர்ச்சியையும் மன உளைச்சலையும் ஏற்படுத்தியது.

சட்டப்பேரவையில் தனித் தீர்மானம் மற்றும் அனைத்துக் கட்சிகளின் ஆதரவு

இந்தப் பிரச்சனை குறித்து தமிழ்நாடு அரசு ஊழியர்கள் ஆசிரியர்கள் நல கூட்டமைப்பு உள்ளிட்ட பல்வேறு ஆசிரியர் சங்கங்களின் பிரதிநிதிகள் மாண்புமிகு பள்ளிக்கல்வித்துறை அமைச்சர் ஆ. ராஜ்மோகன் அவர்களை சந்தித்து முறையிட்டனர். இதனையடுத்து, ஆசிரியர்களின் வாழ்வாதாரத்தைக் காக்கும் பொருட்டு, 23.08.2010-க்கு முன்னர் பணியில் சேர்ந்த இடைநிலை மற்றும் பட்டதாரி ஆசிரியர்களுக்குத் தகுதித் தேர்வில் இருந்து முழுவதுமாக விலக்களிக்க வேண்டும் என்ற வரலாற்றுச் சிறப்புமிக்க தனித் தீர்மானத்தை அமைச்சர் சட்டப்பேரவையில் கொண்டுவந்தார்.

இந்தத் தீர்மானத்திற்கு தி.மு.க., அ.தி.மு.க., காங்கிரஸ், பா.ம.க., வி.சி.க. மற்றும் இடதுசாரி கட்சிகள் உள்ளிட்ட அனைத்துக் கட்சிகளும் ஒருமனதாக ஆதரவு தெரிவித்தன. அதனைத் தொடர்ந்து குரல் வாக்கெடுப்பு மூலம் தீர்மானம் ஒருமனதாக நிறைவேற்றப்பட்டதாக அறிவிக்கப்பட்டது.

தமிழ்நாடு அரசு ஊழியர்கள் ஆசிரியர்கள் நல கூட்டமைப்பு வரவேற்பும் கோரிக்கைகளும்

தமிழக அரசின் இந்த வரலாற்றுச் சிறப்புமிக்க நடவடிக்கையை தமிழ்நாடு அரசு ஊழியர்கள் ஆசிரியர்கள் நல கூட்டமைப்பின் நிறுவனத் தலைவர் சா. அருணன் பெரிதும் வரவேற்றுள்ளார். மேலும் அவர் விடுத்துள்ள அறிக்கையில் பின்வரும் கோரிக்கைகளை முன்வைத்துள்ளார்:

* இந்தத் தீர்மானத்தை ஏற்று, தேசியக் கல்விக் குழுமம் மற்றும் நாடாளுமன்றக் கூட்டுக்குழு மூலம் ஒன்றிய அரசு உடனடியாக சட்டத்திருத்தத்தைக் கொண்டுவந்து, தமிழகம் மற்றும் இந்தியா முழுவதும் உள்ள லட்சக்கணக்கான ஆசிரியர்களின் வாழ்வாதாரத்தைப் பாதுகாக்க வேண்டும்.
* தீர்மானத்தைக் கொண்டுவந்த மாண்புமிகு தமிழ்நாடு முதலமைச்சர் மற்றும் பள்ளிக்கல்வித்துறை அமைச்சர் அவர்களுக்கும், ஆதரவு அளித்த அனைத்துக் கட்சிகளுக்கும் நெஞ்சார்ந்த நன்றிகள்.
* பிற மாநிலங்களைப் போன்று பணியில் இருக்கும் ஆசிரியர்களுக்கு நடத்தும் சிறப்புத் தகுதித் தேர்வில் 40 விழுக்காடு மதிப்பெண் பெற்றால் தேர்ச்சி என நிர்ணயிக்க வேண்டும். பணிமூப்பு, மேற்படிப்பு மற்றும் கற்பித்தல் திறன் செய்முறை ஆகியவற்றுக்கு உரிய மதிப்பெண்கள் வழங்கி அனைவரையும் தேர்ச்சி அடையச் செய்ய வேண்டும்.

தொடர்ந்து கல்வித்துறை சார்ந்த துல்லியமான செய்திகளை உடனுக்குடன் தெரிந்து கொள்ள நமது இணையதளத்துடன் இணைந்திருங்கள்!