சேலம்: இந்தியாவில் 2027-ஆம் ஆண்டிற்கான மக்கள் தொகை கணக்கெடுப்புப் பணிகள் (Census 2027) விறுவிறுப்பாகத் தொடங்கியுள்ளன.
இதன் முதற்கட்டமாக வீடுகள் கணக்கெடுப்பு மற்றும் வீட்டுப் பட்டியல் தயாரிக்கும் பணிகளுக்காக ஆசிரியர்களை உடனடியாக களப்பணிக்கு அனுப்ப சேலம் மாவட்ட ஆட்சியர் சுற்றறிக்கை வெளியிட்டுள்ளார்.
இது குறித்து சேலம் மாவட்ட முதன்மை மக்கள் தொகை கணக்கெடுப்பு அலுவலரும் மாவட்ட ஆட்சியருமான திரு.க.இளம்பகவத், இ.ஆ.ப. அவர்களின் உத்தரவின்பேரில் அதிகாரப்பூர்வ அறிவிப்பு வெளியாகி உள்ளது.
சுயக் கணக்கெடுப்பு மற்றும் களப்பணி தேதிகள்:
வருவாய் நிர்வாக ஆணையரின் வழிகாட்டுதலின்படி தமிழ்நாட்டில் மக்கள் தொகை கணக்கெடுப்பு இரண்டு கட்டங்களாக செயல்படுத்தப்பட்டு வருகிறது:
- சுயக் கணக்கெடுப்பு (Self-Enumeration): பொதுமக்கள் இணையவழியில் தாங்களாகவே தகவல்களைப் பதிவு செய்யும் வசதி ஜூலை 17, 2026 முதல் ஜூலை 31, 2026 வரை வழங்கப்பட்டது.
- வீடுகள் கணக்கெடுப்பு (House Listing): நேரடியாக வீடுகளுக்குச் சென்று தரவுகளைச் சேகரிக்கும் முதற்கட்ட களப்பணி ஆகஸ்ட் 01, 2026 முதல் ஆகஸ்ட் 30, 2026 வரை தமிழ்நாடு முழுவதும் நடைபெறுகிறது.
ஆசிரியர்களுக்கு மாவட்ட நிர்வாகம் பிறப்பித்த உத்தரவு:
சேலம் மாவட்டத்திற்குட்பட்ட பேரூர்ராட்சிகள், நகராட்சிகள் மற்றும் வருவாய் வட்டங்கள் உள்ளிட்ட அனைத்து நிர்வாகப் பகுதிகளிலும் வீடுகள் கணக்கெடுப்புப் பணிகளை மேற்கொள்ள ஆசிரியர்கள் நியமிக்கப்பட்டுள்ளனர்.
கணக்கெடுப்பாளர்கள் (Enumeration Staff) மற்றும் மேற்பார்வையாளர்களாக (Supervisors) நியமிக்கப்பட்டுள்ள பள்ளி ஆசிரியர்களை, ஆகஸ்ட் மாதம் முழுவதும் குறிப்பிட்ட தேதிகளில் களப்பணிக்குச் செல்ல அனுமதிக்குமாறு பள்ளித் தலைமை ஆசிரியர்களுக்கு அறிவுறுத்தப்பட்டுள்ளது.
இது தொடர்பான உத்தரவை முதன்மை கல்வி அலுவலர் (CEO), சத்துணவு திட்ட மாவட்ட ஆட்சியரின் நேர்முக உதவியாளர் மற்றும் ஒருங்கிணைந்த குழந்தைகள் வளர்ச்சித் திட்ட (ICDS) அலுவலர் ஆகியோருக்கு சேலம் மாவட்ட நிர்வாகம் அனுப்பியுள்ளது.
டிஜிட்டல் முறையில் நடைபெறும் கணக்கெடுப்பு:
இந்த முறை மக்கள் தொகை கணக்கெடுப்பு முழுமையாக டிஜிட்டல் மயமாக்கப்பட்டு மொபைல் செயலி (Mobile App) மூலமாக தகவல்கள் பதிவேற்றம் செய்யப்படுகின்றன.
பொதுமக்கள் தங்கள் பகுதிக்கு வரும் கணக்கெடுப்புப் பணியாளர்களுக்கு உரிய தகவல்களை வழங்கி முழு ஒத்துழைப்பு அளிக்குமாறு கேட்டுக்கொள்ளப்படுகிறார்கள்.
No comments:
Post a Comment
கல்விச்செய்தி நண்பர்களே.. வாசகர்களின் கருத்து சுதந்திரத்தை வரவேற்கும் இந்தப்பகுதியை ஆரோக்கியமாக பயன்படுத்திக் கொள்ள அன்புடன் வேண்டுகிறோம்.